ಎದೆಯೊಳಗಿನ ಪುಷ್ಯಮಳೆ

ಕತ್ತಲೆಯಲ್ಲಿ ಆರು ಕಣ್ಣುಗಳು

ಮಿಂಚು ಹೊಳೆದಂತೆಲ್ಲ ಫಳ ಫಳ

ಸೂರಿನ ಮೇಲೆ ಮುಗಿಬಿದ್ದಿದೆ

ದೊಡ್ಡ ಪುಷ್ಯಮಳೆ

ಮೂಟೆಯಡಿ ಬಿದ್ದ ಸಂಕುವಿಗೆ

ಮೊಣಕಾಲೆಲ್ಲ ಗಾಯ

ತೂತು ಬಿದ್ದ ಕೊಡೆಯಲ್ಲಿ ನೀರು

ಹರಿದಿದ್ದು ರಕ್ತಕಣ್ಣೀರು

ಕೈಯ್ಯಲ್ಲಿ ಚಾಕು, ಗೋಟು ಅಡಿಕೆ

ಪಾತಿಯ ಓಟ ಸೂರಿನೆಡೆಗೆ

ಮಳೆಗೆ ತೊಯ್ದ ಸೀರೆ ಕಪ್ಪು

ಒದ್ದೆಯಾದ ಒಡಲು ಉರಿದಿತ್ತು

ಇಬ್ಬರದೂ ಹಿಡಿ ಹಿಡಿ ಶಾಪ

ಪುಷ್ಯ ಮಳೆಗೆ ಆರದಿರಲಿ ದೀಪ

ನಿಂತಿಲ್ಲ ಓಟ, ನಿಂತಿಲ್ಲ ಮಳೆ

ಕಣ್ಣುಗಳಲ್ಲಿ ಅದೇ ಭಯ, ಹೊಳಪು

ಪಾತಿ-ಸಂಕು, ಗೋಣಿತಾಟು ಸರಿಸಿ

ಚಿಮುಣಿ ಬುಡ್ಡಿಗೆ ಕಡ್ಡಿ ಕೀರಿದಾಗ

ಕಣ್ಣುಗಳಲ್ಲಿ ಈಗ ಬೆಳಕಿತ್ತು

ಎದೆಯೊಳಗಿನ ಪುಷ್ಯಮಳೆ ನಿಂತಿತು